Սովորել է Ալ. Սպենդիարյանի անվան երաժշտական մասնագիտական դպրոցում, միաժամանակ Պիոներ պալատի փողային նվագախմբում եղել է շեփորահար։

1953-1957թթ. սովորել է Երևանի Ռոմանոս Մելիքյանի անվան երաժշտական ուսումնարանի կոմպոզիտորական ֆակուլտետում (պրոֆ.՝ Էդուարդ Բաղդասարյան)։

1962թ. ավարտել է Երևանի Կոմիտասի անվան պետական կոնսերվատորիայի կոմպոզիտորական ֆակուլտետը (պրոֆ.՝ Գրիգոր Եղիազարյան)։

1955թ.-ից աշխատել է Երևանի Սունդուկյանի անվան ազգային ակադեմիական թատրոնում՝ որպես շեփորահար (1960-1979 թթ.՝ որպես երաժշտական մասի ղեկավար և դիրիժոր)

1963-1981թթ. տեսական առարկաներ է դասավանդել երաժշտական ուսումնական հաստատություններում։

1960թ.-ից ստեղծել և ղեկավարել է էստրադային և ժողովրդական նվագարանների նվագախմբեր, որոնք անընդմեջ մասնակցելով հանրապետական և համամիութենական բազմաթիվ մրցույթների, արժանացել են մրցանակների և պատվոգրերի։

1972թ. դարձել է ԽՍՀՄ Կոմպոզիտորների միության անդամ

1979-1986թթ. հանդիսացել է Հայաստանի Ռադիոյի և հեռուստատեսության «Արևիկ» մանկական վոկալ-գործիքային անսամբլի հիմնադիրն ու գեղարվեստական ղեկավարը։ Այդ տարիներին «Արևիկը» արժանացել է հանրապետական, անդրկովկասյան և ԽՍՀՄ կազմավորման 60-ամյակին նվիրված մրցույթների դափնեկրի կոչման, իսկ մերձմոսկովյան Դուբնա քաղաքում՝ «Մեծ ոսկե» մեդալի։

1986-1995թթ. եղել է Հեռուստառադիոյի Արամ Մերանգուլյանի անվան ժողովրդական նվագարանների նվագախմբի դիրիժոր։

1995թ. Հայաստանի պաշտպանության նախարարության ներքո ստեղծել է «Էլեգիա» էստրադային համույթը, որը համերգներով հանդես է եկել Հայաստանում և Լեռնային Ղարաբաղում։

1993-2007թթ. եղել է Մայր աթոռ սուրբ Էջմիածնի և Հայկական Բարեգործական Ընդհանուր Միության հայորդաց տների երաժշտության գծով գլխավոր խորհրդատու, Հեռուստառադիոյի կոմիտեի և ՀՀ Երգչախմբային ընկերության գեղարվեստական խորհուրդների անդամ

2003թ.-ից եղել է ՀՀ Երգչախմբային ընկերության պատվավոր անդամ:

Հեղինակել է սիմֆոնիկ, փողային, ժողովրդական, էստրադային, վոկալ և նվագարանային ստեղծագործությունների։

Պետրոսյանի հեղինակած ավելի քան 300 ստեղծագործություն ընդգրկված է Հայաստանի հանրային ռադիոյի ոսկե ձայնադարանում։ Դրանք են՝

Սիմֆոնիա (4 մաս)

2 լարային կվարտետ

4 վոկալ-սիմֆոնիկ պոեմ

4 մանկական կանտատ

Շեփորի կոնցերտ

Կոնցերտինո սաքսոֆոնի համար

Երաժշտական հեքիաթ «Արքայազնը և փայտահատը»

Մանկական մյուզիքլ «Մկնիկ-հարսնացուն»

Կատարել է մեծ թվով մշակումներ, փոխադրումներ և գործիքավորումներ սիմֆոնիկ, փողային, ժողովրդական և էստրադային նվագախմբերի և նվագարանների համար, անդրադառնալով ժողովրդական երգերին՝ հայ, ռուս և արևմտաեվրոպական կոմպոզիտորների ստեղծագործություններին։

1957-2008թթ. Ռ. Պետրոսյանի ստեղծագործություններից 77-ը արժանացել են հանրապետական և համամիութենական մրցանակների

1995թ. Հայաստանի պաշտպանության նախարարության ոսկե մեդալ